نہیں محصور ہرگز راستہ قُدرت نمائی کا

خدا کی قدرتوں کا حصر دعویٰ ہے خدائی کا

قُدرت سے اپنی ذات کا دیتا ہے حق ثبوت

اس بے نشاں کی چہرہ نمائی یہی تو ہے

جس بات کو کہے کہ کروں گا یہ میں ضرور

ٹلتی نہیں وہ بات خدائی یہی تو ہے

جس نے پیدا کیا وہی جانے

دوسرا کیونکر اُس کو پہچانے

غیر کو غیر کی خبر کیا ہو

نظرِ دُور کارگر کیا ہو

ہم نے اُلفت میں تِری بار اُٹھایا کیا کیا

تجھ کو دکھلا کے فلک نے ہے دکھایا کیا کیا

جو ہمارا تھا وہ اب دِلبر کا سارا ہو گیا

آج ہم دِلبر کے اور دِلبر ہمارا ہو گیا

شکر لِلّٰہ! مل گیا ہم کو وہ لعلِ بے بدل

کیا ہوا گر قوم کا دل سنگ خارا ہو گیا

پیش گوئی کا جب انجام ہویدا ہو گا!

قُدرتِ حق کا عجب ایک تماشا ہو گا

جھوٹ اور سچ میں جو ہے فرق وہ پیدا ہو گا

کوئی پا جائے گا عزت کوئی رُسوا ہو گا!

لوگوں کے بُغضوں سے اور کینوں سے کیا ہوتا ہے

جس کا کوئی بھی نہیں اُس کا خدا ہوتا ہے

بے خدا کوئی بھی ساتھی نہیں تکلیف کے وقت

اپنا سایہ بھی اندھیرے میں جُدا ہوتا ہے

جس کی تعلیم یہ خیانت ہے

ایسے دِیں پر ہزار لعنت ہے

دوستو اِک نظر خدا کے لئے

سیّد الخلق مصطفیٰؐ کے لئے

کوئی جو مُردوں کے عالَم میں جاوے

وہ خود ہو مُردہ تب وہ راہ پاوے

کہو زِندوں کا مُردوں سے ہے کیا جوڑ

یہ کیونکر ہو کوئی ہم کو بتاوے

مر گیا بدبخت اپنے وار سے

کٹ گیا سَر اپنی ہی تلوار سے

کھل گئی ساری حقیقت سیف کی

کم کرو اب ناز اُس مُردار سے

کیسے کافر ہیں مانتے ہی نہیں

ہم نے سَو سَو طرح سے سمجھایا

اِس غرض سے کہ زندہ یہ ہوویں

ہم نے مرنا بھی دِل میں ٹھہرایا

بھر گیا باغ اب تو پُھولوں سے

آؤ بُلبل چلیں کہ وقت آیا

جب سے اے یار! تجھے یار بنایا ہم نے

ہر نئے روز نیا نام رکھایا ہم نے

کیوں کوئی خلق کے طعنوں کی ہمیں دے دھمکی

تو سب نقش دل اپنے سے مٹایا ہم نے

اگر وہ جاں کو طلب کرتے ہیں تو جاں ہی سہی

بلا سے کچھ تو نپٹ جائے فیصلہ دِل کا

اگر ہزار بلا ہو تو دِل نہیں ڈرتا

ذرا تو دیکھئے کیسا ہے حوصلہ دِل کا

وقت تھا وقتِ مسیحا، نہ کسی اور کا وقت

مَیں نہ آتا تو کوئی اَور ہی آیا ہوتا

چل رہی ہے نسیم رحمت کی

جو دعا کیجئے قبول ہے آج